زجل بقلم – محمود محمدي العجواني : احد ابناء السياحة المصرية
أوعى يا خويا تزعل منى دانا منك وانتا منى عندى نصيحة راحقولها لك جلدك ما يحكه إلا أظفارك
أنا قلتلكم كلمة زمان خلى ف قلبك ليها مكان لا قرعة ولا جمعيات الحج حق الشركات
والحكما قالونا زمان وكلامهم بالماس أوزان إل الميه ف إيده مش زى ال ف إيدو النار
لأ ويطالبوا بكل بجاحة إنك ما تحقق أرباح هيا بجاحة ولا وقاحة ولا سفاهة ولا تناحة
والأرباح ف الدين مشروعة مفيهاش حرمة ولا ممنوعة واسألوا أهل الفتوى كمان هيقوللكو الربح حلال
ويجيلك مأمور لضرايب هتقوله طلعت خسرانة هيقولك كداب والمصحف وبأعلى شريحة راحتدفع
قلنا الأمن للداخلية جابوا شيوخ يتعلموا فيه طاب ما الشيخ ماهو شغلو أهم والدين هو أساس الأمن
انتوا ف شغلكو مش فالحين بس علينا معلمين ماهو الأمن أديكو شافين ليل ونهار دايما خايفين
مش عارفين لا نروح ولا نيجى ليل ونهار دايما صاحيين ولا تشوفوا رجال الدين إل لأعمالهم تاركين
لا إمامة ولا فقه ف دين ولا علِّموا مخلوق الدين طاب دا بيقبض راتب ليه مش دا حرامي ولا إيه
م الشيوخ للداخلية جرى إيه يا عم انت وهوه واحنا هفية ولا إيه هيا الدنيا جرالها إيه
متهونا جاتكم غم ولا هنقلبهالكم دم أنا قلتلكم كلمة زمان خلى ف قلبك ليها مكان
شغلنا واحنا كمان فاهمينه متدوا العيش لخبازينه إذا كانوا هيشتغلوا معانا فاحنا كمان نشتغلوا معاهم
وادينوا من الداخلية نصيب وكمان حصة من الصناديق وكمان الأزهر لو عايز مش هنعارض ولا هنمانع
بس نشاركة ف كل شؤونه وال يشاركنا نشاركوه والأوقاف مرحب بيهم بس الوقف كفاية عليهم
ون كانوا لسة مصرين فاحنا معاهم متساويين أنا قلتلكو الأمر خطير لازم ننزل ع التحرير
والتمر مبتجيبو رسايل وال يروح يرجع شايل شركاتنا والرخصة معانا يبقى ال مخالف يساوينا ؟
قالوا الدولة فيها تغيير قلت صحيح بس دا تخريب أحوالنا رجعت كما كنا لأ وفساد أكتر م الأول
فين الدولة وفين الناس إحنا صحاب الحق يا ناس
