فرخ الوز عوام وابن القاضي قاضي..؟!
.jpg)
بقلم د. محسن الصفار
تناقلت وكالات الانباء خبرا عن وزير للعدل في احدى الدول العربية صرح في مقابلة بأن ابن عامل النظافة لايستطيع ان يكون قاضيا وان القاضي يجب ان يكون من بيئة محترمة مما ادى الى احتجاجات واسعة ادت الى اقالته او استقاله وللتعرف على طبيعة وخفايا الموضوع قامت اذاعة صوت الخيال باجراء لقاء صريح مع الوزير السابق هذا نصها.
المراسل: معالي الوزير السابق ماذا حصل بالضبط؟
الوزير: ولا حاجة تستاهل الشوشرة ووجع الدماغ ده انا قلت يادوبك ان القاضي لازم يكون واحد ملو هدومه وابن ناس مش ابن زبال ريحته معفنة يجي يعمل قاضي على اخر الزمن.
المراسل: الا يعتبر هذا نوعا من التمييز الطبقي في المجتمع؟
الوزير: يا عم تمييز ايه وبتاع ايه طول عمرها بلدنا فيها ناس باشوات وناس عاديين والباشا باشا هو وابنه وحفيده والمواطن العادي يفضل عادي هو وكل عيلته من بعده هو مش المثل بيقول الناس مقامات؟ شمعنى جات عندي وبقت الناس كلها زي بعضها؟
المراسل: ماهي الطبقة التي يحق لابنائها العمل كقضاة؟
الوزير: شوف حضرتك لو بصيت على القضاة ووكلاء النيابة عندنا حتلاقيهم كلهم تقريبا من خمس او ست عيل همة اللي بيتوارثوا المهنة دي ابا عن جد زي الحرف التراثية والفلوكلور يعني حد اعترض مثلا ليه ابن الحايك يطلع حايك؟ شمعنى القاضي؟ ليه ما نحافظش على التراث الجميل ده في عيل معينة تتوارثه جيل بعد جيل؟
شفت اعلان التعزية في الجريدة ثلاثين واحد من عيلة واحدة كلهم قضاة ومستشارين ووكلاء نيابة ده اسمه ايه؟ اسمه اصالة ومحافظة على التقاليد مش تقول لي تمييز وبتاع.
المراسل: معالي الوزير هذا كلام غير منطقي فهل يحرم طالب ذكي ومجتهد من منصب القضاء لان ابوه عامل نظافة او زبال بالعامية؟
الوزير: مين قال اصلا ان القاضي عندنا لازم يكون ذكي ومجتهد؟ القاضي لازم يكون واد كويس ويسمع الكلام ويدي الحق دايما للناس الابهة ولو بقى غير كدة حتلاقي الجرابيع وولاد الشوارع كل يوم يكسبوا قضية ضد الاغنياء ويعكننوا مزاجهم .ترضاها انت؟ حرام والله.
المراسل: يعني على حسب كلامك يجب تصنيف الطلبة من الاول ابتدائي على حسب
مهن ابائهم ابن الطبيب طبيب وابن المعلم معلم وابن الزبال زبال وابن القاضي؟
الوزير: والله فكرة جميلة وياريت الاقتراح العملي ده يتطبق ونخلص من وجع الدماغ بتوع الفقرا اللي عاوزين يمدوا رجلهم بره لحافهم ويحطوا راسهم بروس الباشوات وولاد الاصول.
المراسل: سؤال اخير هل استقلت ام اقلت؟
الوزير: حتفرق ايه اهو قطع عيش وخلاص
المراسل: في كلا الحالتين تم رميك في المكان المناسب وهو الزبالة وشكرا لك على هذا اللقاء.
* هذه المقابلة وهمية ولا تمت للواقع بصلة واي تشابه بينها وبين الواقع محض صدفة لاغير
