نصب الغردقة التذكارى برائحه الموت
.jpg)
بقلم : أشرف سركيس
كل سنه وانتم طيبين وراس السنه واعياد الكريسماس على الابواب ودول العالم كلها حتى الاسلاميه منها بدأت فى نصب شجر اعياد الميلاد وتزيينه بالاضاءات وهدايا بابا نويل والاجراس والورود وعمل الدعايه والاعلان لحفلات راس السنه والكريسماس.
وفى دول بتتنافس على اكبر شجره عيد ميلاد عشان تدخل بيها موسوعه جينيس العالمية وعشان تعمل لنفسها ترويج ودعايه سياحيه تجتذب فيها السياح من كل مكان.
وبدل ما مدينة زى الغردقة اللى طموحها تكون عاصمه للسياحه العالميه تستعد زى باقى المدن العالمية وتكون على نفس مستوى الحدث وتبدأ فى تزيين مطارات الوصول والموانى والميادين ومداخل الشوارع الرئيسيه بما يتناسب مع اهميه موسم راس السنه واعياد الكريسماس.
قامت بترك نصب تذكارى قصدى بيت رعب تفوح منه رائحه الموت ويكتب عنوان للاهمال والرعونه والتخلف وفين بجوار المطار الدولى مباشره اه والله بجوار المطار ويبعد عنه حوالى 50 متر تقريبا
ولو مش مصدق بص على الصور وهى هتقولك مكانها فين يعنى اللى جاى من بره عشان يزورنا لاول مره وكله امل يقضى اجازه سعيدة.
واللى مسافر بعد ما قضى اجازته بيتفرج على الفضائح بتاعتنا لا وساعات بيقف ويصورها عشان تكون اجمل دعايه لينا وبدل ما ننكسف على دمنا وندارى خيبتنا وتخلفنا لا مطنشين ولا حياه لمن تنادى.
الموضوع ببساطه يوم الاربعاء 28 نوفمبر الساعه 7 صباحا حدثت حادثه مروعه كالعاده بين اتوبيس شايل موظفين غلابه من العاملين بفندق من فنادق رجل الاعمال حسام الشاعر وسياره ملاكى اخر واحدث موديل كان راكبها ابن رجل الاعمال كامل ابو على.
وكنت موجود وقتها وشاهد على الحدث وعلى نقل المصابين للمستشفى والصورة بتحكى عن بشاعه الحادث ولكن كان ربنا لطيف بعباده والحمدلله محدش مات فى الحادثه دى وربنا سلم وعدت على خير.
كل سكان الغردقة رايحين جايين على الطريق شايفين الحادثه على الطبيعه الاتوبيس مقلوب على ظهره بجوار سور المطار والعربيه الملاكى حاظنه نخله كبيره والنهارده الاثنين 3 ديسمبر 2012 يعنى تقريبا 6 ايام والاتوبيس والعربيه الملاكى زى ما هما محدش كلف خاطره وشالهم بعيد عن مدخل المطار والطريق الرئيسى اللى بيوصل للفنادق وقلب مدينة الغردقة.
لا ونش المرور ولا ونش المحافظة ولا اى مسئول حتى لفت نظره شكل الاتوبيس المقلوب ولا منظر بشاعه الحادث ورائحه الدم اللى بتفوح من المكان وانا اضطريت اكتب لانه ببساطه لو محدش كلف خاطره وشالهم هيبقى الغردقة شعارها مكان العروسه يبقى الاتوبيس المقلوب.
وبدل ما تكون الغردقة عروس البحر الاحمر هتكون جثه البحر الاحمر.
يا ناس حرام عليكم اختشوا بقى واتحركوا وفوقوا وكفايه لا مبالاه وكفايه كل واحد يتكل على التانى.
فين مكتب المحافظ ومكتب وزاره السياحه بالغردقة ومكتب الهيئة المصرية لتنشيط السياحه وفين ادارة السياحه بالمحافظة وفين اداره مرور الغردقة وفين قيادات امن البحر الاحمر اللى سايبين الفضيحه دى بالمنظر السىء ده وفين جنب مطار الغردقة مباشرة.
يا ناس يا عالم احنا فى اكبر مدينة سياحيه فى مصر والاف البيوت مفتوحه من السياحه ودى المدينة الوحيده اللى لسه شغاله وربنا نافخ فى صورتها.
يا ناس حسوا بينا وبالشعب واعرفوا يعنى ايه كلمه سياحه وبان اقل منظر او اى تصرف غير حضارى بيسيب اثر فى اللى جاى يزورنا وبيعملنا اسواء دعايه ممكن نتخيلها.
ابوس ايديكم حافظوا على سمعتنا وعلى اخر امل باقي لنا لاننا وببساطه مبنفهمش غير فى السياحه ومشتغلناش غير فيها ومتعلمناش الا هى .
اللهم قد بلغت اللهم فاشهد
