فجل يا كلاب!! بقلم السيد الدمرداش

وقام سيادته ملأ القلل.. بالماء والنعناع وحط شوية الفجل فى «مشنة» بلدى.. وجلس حضرته على ناصية الشارع.. يبيع الفجل.. ينادى عن حد عطشان.. يشرب .. صحيح هو فقير بس باشا ابن باشا.. فقرر أن ينادى على الفجل.. جلس على الكرسى وضع ساقاً على ساق ممسكا «بمنشته» وطربوشاً أحمر على رأسه.. الناس خايفه تشترى منه حاجة.. أو لا تملك أن تسأله عن الفجل والقلل الفيومى.. أو حتى يسألوه لماذا يجلس هكذا.. أشعل بقايا سيجاراً.. كانت بحورته.. ونادى على الناس.. ليبع لهم الفجل .. فجل.. ياكلاب!!

فجل الباشا ياكلاب!! حصلت حاجة غريبة قوى.. اكتشف سيادته أن الناس بدأت بالفعل تشترى الفجل منه.. يعنى بالمفتشر.. كده جواهم.. «عبد» العبودية.. ناحلة وبرهم..!!

وكل لما واحد.. يحب يشرب من قلة معينة.. ينظر إليه ويقوله انت ياحيوان.. ياخرسيس بلاش دى.. أنت ياولد.. أشرب.. من التانية دى. بلا مبرر!! لكن باشا ويتأمر.. حقه هو شايف كده!! لكن باشوات الأيام دى حاجة مسخره.. الواحد منهم مثلاً يعنى.. ينسى أصله.. كان بياع فجل.. وبقى باشا كبير عنده فلوس.. أصل الفلوس..يعنى بقى سيادته باشا.. أصلك قرشك.. شعار باشوات الزمن ده.. .. عيال بنت هرمة وابن الهرمة ده راكب العالى .. والغريب فى الموضوع.. والمهم أيضا إن الواحد فيهم تدب فى عين أبوه.. رصاصه..

فاهم إن إحنا عيال صيع.. ومنعرفش حاجة.. وهو حمار حصاوى مش فاهم إن حتى عبطه .. باين.. فى «الجل» الرخيص اللى لازقة دايما فى شعره لسه.. الواد مش مصدق إنه غنى وعنده فلوس كتير.. مصدرها يخض الله أعلم.. صحيح السياحة مبتكسبش كل ده ياعم «زعبله بك» لأن فى ناس كتير اشتغلوها قبل أنت وأبوك ما يكون عندكوا مكتب.. وكنت كعب داير ساعتها فى سليمان باشا والمرافق تطاردك.. وانت بتبيع تذاكر للزباين..

 ومره الواد سنؤر.. اللى علي ناصية عبدالخالق ثروت من سليمان باشا.. راح …………. وأنت ياعينى جريت و خفت.. ما علينا دى حكايات قديمة.. وبرضة مش عيب والضرب  كان ساعتها برضة مش عيب.. وبوس الأيادى علشان كرسى فى غرفة او حتى نادى مش عيب!! يعنى تشتغل يابنى سريح.. تشتغل هلييب..

كله شغل ومش عيب طالما بتعرف وأنا بصراحة.. اقولها امام كل الناس.. أن عقدة الخواجة.. الباشا يعنى القديم.. اللى كان الكل يوطى له.. بالمفتشر كده كله كان بيوطى ودى أصلها من الوطيان.. وأصل الوطيان دى ليها حكاية غريبة قوى.. وكبيرة بس الحقيقة .. أنا خايف من أخونا أشرف الجداوى بينى وبينكم ده راجل كشر كده.. وهيقعد يغتت ويقولى يا عمنا بلاش الطفية اللى بتشربها دى.. عايز يقولى.. المساحة كتيرة عليك.. وأنت لا بتعرف تكتب ولا تهبب وبما أنه صاحب الدكانه دى تبقى برضه حاجة فيها ريحه.. وطيان.. ما علينا..

قبل ما أنسى عايز أقول للباشا الجديد بتاعنا ياواد أنت بقيت غنى «بلاش الراجل اللى فى الحارة القديمة اللى بتشترى من عنده الصنف ده» غيرهِّ .. فى محلات وماركات.. وتقدر تشتري ياواد أنت عندك فلوس مش هتخلص.. متخافش.. دلع نفسك..!!

أنت أروبه.. وعيل جامد.. ابن هرمه وصايع بحر بس.. بلاش تتهبل كل شوية.. وتحاول أو حتى تفكر تلسن على السادة الصحفيين دول.. علشان خاطرى بلاش.. إنت على رأسك «خمستلاف» بطحه.. كل واحدة فيهم قضية!! بلاش أحسن.. فاهم.. ولا.. المرة الجاية أفهمك أكتر!! الملفات كتير وفتحها مش فى صالحك وانت عارف وانا عارف ؟ وأوعى تعمل زى الباشا.. اللى بحق وحقيقى.. وتقول للناس.. فجل يا كلاب!!
لأنك أنت مجرد دوبلير هلفوت.. حاجة كده يعنى.. منظر.. فاهم..!!