حوار – اشرف سركيس
الغردقة – تسحرني ببراءتها وانوثتها واناقتها فهي كاليمامة الضاحكة وكعروس النيل الأسطورية المتبخترة على بساط ماء النيل اللؤلؤي.. جذورها مصر الحضارة، وأغصانها خضراء يافعة تتفرع في كافة ارجاء الوطن العربي وروحها تحلق في سماء الجمال وصوتها يرنم فرحا وسعادة بكونها انثى عربية .. حصريا ولأول مره وفى حوار وسبق صحفي وبمناسبة عيد الحب تكلمت ملكة الموضة الجميلة الرائعة المتميزة سالي برسوم Sallyk من قلبها عن مظهر المرأة ومكانتها وعن الجمال والازياء والجديد في عالم الموضة .
برحب بحضرتك وبشكرك على اتاحتك الفرصة لينا عشان نقرب منك ونعرف عنك وعن الموضة والجمال الكثير وعن العلامة Sallyk
♥في رأيك أي من الشعوب العربية مغرم بالموضة واكثر انفاقا عليها؟
♦♦اكيد الشعب اللبناني ويليه دول الخليج زي الامارات والسعودية والكويت أصحاب الدخول المرتفعة ،وانا احب يكون لكل واحد استايله وشكله اللي يتناسب مع جسمه وسنه ، ومنجريش وراء الموضة وخلاص واهم حاجه يكون الانسان مرتاح نفسيا مع لبسه ومظهره .
♥بصراحة تقييمك ايه للست المصرية وهل هي مهووسة بالموضة وبتمشي وراها؟
♦♦الست المصرية ذكية وتختار ما يناسبها من الموضة وبما يتناسب ويتماشى مع نظرة المجتمع اللي بتبقا متواجدة فيه .
♥هل الست المحجبة ليها نصيب من الموضة السنه دي؟
♦♦الست المحجبة بتستري سوار يهات ولا أروع وبدأت تبدع وتحاول تظهر جمالها عن طريق الحجاب وبشوف منهم الكثير في الافراح متألقين بأناقتهم .
♥ ايه اهم الاكسسوارات اللي تنصحي كل ست وتتمنى ان تكون موجوده عندها ولابد من ارتدائها بشكل دوري ؟
♦♦الشنط طبعا ولازم كل ست يكون عندها شنطة سوداء وبيج او هافان وساعه يد ماركة كويسة ومعروفه تغنيها عن الكثير من الاكسسوارات وكمان نظاره شيك ، وانا مبفضلش المجوهرات الكثيرة مع الملابس .
تنشيط السياحة
♥ أزاي نستغل صناعة الأزياء والموضة في إقامة المعارض وجذب السياحة العربية والأجنبية وبالتالي المساهمة في دعم الاقتصاد المصري؟
♦♦حلم عمرى كنت اعمل عرض أزياء تاريخي لمصر لتنشيط ودعم السياحة وكنت هدعي اشهر مصممي الأزياء العالميين ، وعرضت الفكرة على قيادات الدولة لعمل أسبوع الموضة بصفتي المالكة للاسم والعلامة مع ساندرا برسوم ، واخترت رجل الاعمال هشام طلعت ومدينتي لإقامة أسبوع الموضة وكنت محدده تاريخ 24 مارس بعد أسبوع الموضة في فرنسا وروما ونيويورك ، وقبل أسبوع الموضة في دبى وكنت عامله مفاجأة مذهلة ..
براند متكامل باسم (تحيا مصر) يحتوى على البارفانات و الشنط والاحذية وغيرها ، ولكن للأسف توقف الحلم والمشروع لعدم وجود التمويل الكافي .
♥ تقييمك ايه لصناع الموضة المصريين وشافيه أزاي صناعة الملابس الجاهزة المصرية في المستقبل ؟
♦♦الصناعة المصرية في تقدم مذهل في صناعه الأزياء وتصدير الملابس الجاهزة وكمان الحمد لله عندنا مصممين أزياء عالميين ومبدعين وليهم أسمائهم ومكانتهم .
♥مين هم عملائك من المشاهير والفنانين وايه اغرب حاجه انطلبت منك ؟
♦♦اشتغلت لكثير من المشاهير والفنانات والشخصيات العامة والمعروفة وتشرفت بتصميم فستان العيد الوطني لسمو الشيخة موزة، وكمان الأميرة صوفيا زوجة ولى العهد في هولندا .
أغلى فستان
♥تقريبا اسعار الفستان السوارية او فستان الزفاف يبدأ من كام وهل في فرصه لمحدودي الدخل بالحصول على فستان من تصميمك بقيمة رمزية؟
♦♦اسعار فساتين الزفاف ملهاش حدود وكان في فستان قريب في الامارات اتكلف مليون دولار مرصع بالأحجار الكريمة والست الشاطرة اللي تختار التصميم اللي بتحبه وتنفذه على اد امكانياتها ، وفى دلوقت فساتين حلوة ورخيصة لمحدودي الدخل وكمان متاح ايجار الفساتين واسعارها مناسبة لكافة المستويات ، وانا بالنسبة لي كنت عامله كورنر مجانى خاص للعرائس اللي مش قادره تدفع تمنه وكان على مستوى عالي من التجهيزات .
♥تفتكري أغلى فستان عملتيه أتباع بكام وكان أيه قصته وايه أغرب المواقف اللي قابلتك واتصرفتى معاها أزاي وتخدى رأى مين اول لما بتنتهي من عمل قطعه من الملابس قبل تسليمها ؟
♦♦طبعا فستان سموه الشيخة بسمة الصباح وقعدت 8 شهور كاملة اشتغل فيه، ومن المواقف الغريبة كنت في عرض أزياء وتعمد احد مصممي الأزياء المنافسين وضع قطعة حديد امام احدى العارضات مما تسبب في قطع فستانها، وكمان موقف طريف كنت في حفل ملكة جمال العرب للآنسات في شرم الشيخ وفوجئت بأحد المتسابقات كانت حاملا فاضطررت لعمل فستان سريع في زمن قياسي لإخفاء بطنها قبل العرض بمدة قليلة .
أخيرا بشكر حضرتك جدا على اللقاء الرائع ده وباتمنالك الصحة والسعادة ومزيد من النجاح والتألق .
