الاعلان الدستورى يجهز على الموسم السياحى
بقلم: اشرف سركيس
تيجى نقسم القمر انتى نصف وانا نص تيجى نرسم على الشجر حرفين اسامينا وبس الله عليها اغنيه وليد توفيق والله على رومانسيتها وعلى احاسيسها وافتكرتها وانا باشوف اللى بيحصل النهارده الثلاثاء الموافق 27 نوفمبر 2012 تيجى نقسم البلد انا نصف وانت نصف تيجى نخرب البلد واكون انا وبس ايه اللى حصل يا ريس ومصر رايحه بينا على فين مصر وحشتنا يا ريس ونفسنا كلنا نترمى فى حضنها كتير علينا الحلم ده والله.
فرحنا يا ريس باروع انتخابات تمت بديموقراطيه حقيقيه وفرحنا اكتر بحريه الاختيار وامانه ونزاهه الصندوق واستبشرنا خير بمشروع النهضه اللى وعدتنا بيه ودعينا من قلبنا ربنا يوفقك ويبارك فى مجهوداتك ويكلل خطواتك بالنجاح والتوفيق عشان خاطرنا احنا وعشان خاطر الحبيبه الغاليه امنا مصر .
ووعدك للسياحيين فى ميدان التحرير بانك تكون وراهم وسند فى ضهرهم خلانا مطمنين وقلنا لعله يكون خير واللى تخاف منه ميجيش احسن منه وحتى اللى منتخبكش منا بطيب خاطر اتمنالك الخير والتوفيق .
بس ايه اللى جرى يا ريس!!
بقالنا 5 شهور يا ريس فى مهاترات وقلنا وقالوا ونلاقيك تاخد قرار وترجع فيه او تاخد قرار وترجع تشرحه وتفسره بعديها وبعد ما تكون خربت مالطه بقالنا 5 شهور ومش حسينك رئيس لينا كلنا ومش قادرين نحط ثقتنا فيك ونطمن وننام وفى بطننا بطيخه صيفى .
بقالنا 5 شهور وكل يوم تغيير وكل يوم مصيبه منلحقش نفوق منها الا ونلاقى كارثه وراها بتهد من عزيمتنا وبتفقدنا قوتنا من قتل الجنود الغلابه اللى اتغدر بيهم فى سيناء وقت صيامهم لمتاهه غزه واسرائيل وتوتر الحدود للنائب العام نشيله ولا نسيبه لحوادث الفتنه الطائفيه واذدراء الاديان للاخد بالتار فى الصعيد للشبكة الارهابيه فى مدينة نصر لحادثه القطر فى الفيوم واسيوط والاطفال اللى ماتوا متقطعين لحوادث الخطف والقتل والسرقه بالاكراه اللى بقت زى الرز.
لمشكله السولار والبنزين وانابيب البوتاجاز ورغيف العيش وقطع الكهرباء كل شويه لمشاكل الاعتصامات والاضرابات والوقفات الفئوية والحركات الاحتجاجيه للسلاح اللى بيدخل مصر من كل شكل ولون لقطع الطريق بالساعات كل يوم وفى كل حته لحق الشهداء والمصابين والبهدله فى المحاكم وضرب القضاه ومحدش عاجبه حد ولا حد عاوز يسمع لحد .
وبقى الاختلاف فى الراى جريمة ممكن تدفع حياتك تمنها ولو قلت رايك وحد سامعه يبقى اتشاهد على روحك وشيل كفنك على ايديك.
وزاد الطين بله اعلانك الدستورى اللى قسمنا فريقين وشق بطن البلد نصفين واللى جه فى وقت قاتل وقبل بدء موسم السياحه واحتفالات راس السنه والكريسماس وبالرغم من جهود وزير السياحه وحرفيته وسفره شمال ويمين عشان يحسن الصوره لكنه يا عينى بينفخ فى قربه مقطوعه.
وهو هيعمل ايه وكل يوم القنوات الفضائية بتنقل فضائح من كل حته فى مصر ومصر بقت لبانه فى كل القنوات الاخباريه على مستوى العالم.
بالذمه يا ريس هو ده كان وقته ولا دى كانت طريقه تعلن بيها اعلان دستورى بكم الصلاحيات دى والبلد اصلا مليانه مشاكل والناس مخنوقه وطالع عين ابوها وبدل ما تطلع تطمن الشعب وتهديه وتقولهم دى فتره انتقاليه لحد ما يبقى فى دستور ومجلس شعب طالع قدام انصارك فرحان معاهم وبتخطب ليهم وبتفكرنى بفيلم اسلاماه والرائع عماد حمدى.
انتم مع اقطاى ولا ايبك وهما فرحانين ويقولوا ايبك ايبك دم اسلام وجابر الشباب اللى زى الفل فى رقبه مين وليه اتظاهروا وليه بدل ما يشوفوا مستقبلهم يروحوا يموتوا فى مظاهرات.
المدارس اللى بقالها اسبوع مش منتظمه والمحلات اللى فى وسط البلد اللى حالها واقف وضباط وعساكر الداخليه اللى منموش بقالهم اسبوع ومتبهدلين كل ده عشان ايه ولصالح مين وامتى هنخرج من الدوامه دى.
يا ريس حرام عليك اخلع عبايه الجماعه وخليك بطل قومى الناس تحلف بيه واخرج من دائره الاخوان والشلليه والعشوائية وخطب صلاه الجمعه ونصائح المرشد ومستشاريين السوء اللى حواليك واللى هيودوا البلد فى ستين داهيه.
يا ريس انت رئيس منتخب فى اول انتخابات حقيقيه وبعد ثوره العالم كله شهدلها واتعشمنا بيك ومعاك الخير لاكبر بلد فى الشرق الاوسط ومعاك ممكن ننطلق لافاق ورحاب الدول المتقدمة .
النهارده مليونيه فى التحرير واعتصامات وربنا يستر فى باقى المحافظات والمفروض كنا النهارده اعلنا عن عوده مهرجان القاهره السينمائى المفروض النهارده كنا اعلنا عن عوده الدورى العام فى كل المسابقات.
الغاءات الموسم السياحى الجديد بدأت وعليه العوض فى الموسم ومش مهم اللى شغالين فى السياحه ومش مهم بيوتهم المفتوحه واللى بقالهم سنه ونصف بينشوا دبان ومش مهم هم اد ايه وعددهم كام وعندهم كام اسرة .
المهم عندك يا ريس الاعلان الدستورى ومجلس الشورى والتاسيسية اللى الواحد كرهها وكره يسمع سيرتها.
والمهم التكويش على الكراسى والمناصب وفى الاخر البلد بتفلس والبورصه بتخرب ورايحين فى سكة حرب اهليه وتقسيم للبلد نصفين ويمكن اكتر.
يا ريس لم الشمل وزى ما انت جرىء وثورى فى قراراتك خليك جرىء واخرج من عبايه الاخوان وحزب الحرية والعدالة.
احنا امانه فى رقابتك وكان لازم يا ريس تصبر شويه وتعدى بالمركب لبر الامان بدل القرارات الثوريه اللى مش وقتها ولا حتى كان ده شكل مناسب لاعلانها.
يرضيك انقسام القضاة ويرضيك انقسام المحامين ويرضيك انك متقدرش تنزل التحرير تانى وانتى اللى فتحت فيه صدرك وقلت انا مش خايف لانى فى حما الشعب.
يرضيك الدستور اللى هيحكم البلد لعمر تانى قدام ميعبرش عنك وعنى وعن كل طوائف الشعب وميحققش الامان لولادى واولادك.
الناس لازم تعيش مطمنه ومرتاحه ولازم تحس بالامان عشان تنتج والبلد ينصلح حالها بجد .
احنا السياحيين لحد دلوقتى خايفين ومرعوبين ومش حاسين بامان والمستثمرين فى حاله احباط من المشاكل السياسيه ومن فزاعه الاخوان المسلمين وفتاوى السلفيين.
ساعات بنسمع عن تحريم الخمور والشواطىء وعن تحريم الموسيقى واغلاق قاعات السينما والبارات وحتى تحريم نزول الاجانب فى الغرف الا بوجود قسائم زواج رسميه ونقول هوجه وتعدى.
وساعات نشوف واحد يخرج علينا ويقول ابو الهول والاهرام اصنام ويعرض فيلم لبطولته فى تفجيره لاثار الانسانيه فى افغانستان ويتباهى ويتفاخر بانه انشالله هيكمل الرساله والجهاد فى مصر ومش هيهداله بال الا لما يجب عليها واطيها.
مشاريع كتير اتوقفت وفنادق كتيره اجلت افتتاحها وحركه بيع انعدمت وشركات سياحه وطيران صفت اعمالها فى مصر ومنظمى رحلات سياحيه مبقوش بيحطوا مصر على خريطه مبيعاتهم السياحية نهائيا.
استثمارات ومستثمرين غيروا وجهه نظرهم لمصر بعد تولى سيادتك الرئاسه عشان مرعوبين من اللى ممكن يحصل فى مصر ومن اللى ممكن البرلمان القادم يقرره بشأن السياحة.
اجانب كتير مقيمين صفوا اعمالهم وباعوا شققهم وممتلكاتهم وقرروا الرحيل
رؤؤس اموال هربت والبورصه حالها ميسرش عدو ولا حبيب واسهم الشركات فى النازل مع استمرار الانفلات الامنى والاعتصامات والاضرابات .
احنا رايحين على فين وناوى يا ريس تعمل معانا ايه وايه خطتك يا ريس بالنسبه لمستقبل السياحيين وفين نصيبنا من خطة ال100 يوم اللى اعلنتها للعمل على عوده الامن والامان والمرور والعيش والنظافة.
واذا كنت من الثوار وكانت الثوره سلم وصولك للكرسى الرئاسى فبطلب منك باسم ملايين السياحيين واسرهم باننا نقوم بثوره تانيه للسياحه فى مصر ونرسم معاك خطة طريق لتخطى حاجز ال25 مليون سائح مع نهايه 2015
عارف يا ريس باحلم بايه ونفسى فى ايه
تعلن عن مصالحه وطنيه وتلم كل التيارات السياسيه تحت جناحك وتكون اب ليهم جيعا وتحكم بالعدل بينهم.
عارف نفسى اكون معاك فين
وانت بتزور يا ريس الهرم وبتوجه دعوه للعالم منه لزياره مصر وتكون هديتك للعالم كله استكمال اكتشاف ما وراء الابواب السريه فى الهرم الاكبر وننقل الحدث ده للعالم كله ونخليهم سهرانين بشوق لحد الصبح مستنيين يشوفوا عظمه اجدادنا الفراعنه وتكون دى اروع دعايه سياحيه لمصر وتوفر ملايين الدولارات من تنشيط السياحه.
نفسى اتصور معاك وانت جنب جدنا ابو الهول وبتهديه اجمل سلام وتحيه وبتوعده انك تحافظ عليه وتكمل خطه ترميمة.
وانت بتوجه دعوة لرجال الاعمال فى مجال السياحة لتنظيم مؤتمر سياحى عالمى لدعوه كافه ممثلى شركات السياحه العالمية للعوده لاحضان مصر الحبيبة ولشمسها الدافئة ولشواطئها الساحره ولاهلها الطيبين.
نفسى اشارك معاك فى تنظيم اوبرا عايدة فى بهو معبد ابو سمبل باسوان وتكون هديه منك لاهلنا وحبايبنا باسوان والنوبة.
باحلم بايديا فى ايدك واحنا بنقص شريط افتتاح مهرجان القاهرة السينمائى القادم وتعلن فيه عن اقامه مهرجان تابع ليه فى الغردقة او شرم الشيخ .
ووحياة ابوك كمان متنساش القاهرة الاسلامية بريحيتها الذكية وكمان تتبنى مشروع تدعو فيه مسيحيين العالم لاكتشاف عبقريه رحله العائله المقدسة فى مصر كمزار سياحى دينى زى اورشليم فى القدس العربية وندعو كل المسيحيين للحج فى مصر .
وحلمى تتبنى يا ريس حملة شعبية باسم كل المصريين نطلب فيها رجوع امنا الغاليه نفرتيتى بالسلامة من المانيا ولو هتسافرلها مخصوص عشان ترجعهلنا بالسلامه ونخليها تنور افتتاح المتحف الجديد بالقاهرة.
يا ريس لو كان كتير منا اختلف معاك وخاف منك ومختركش فى الانتخابات الرئاسية الا انك قادر وبرغم اعلانك الدستورى اللى فرقنا انك تحتوينا كلنا ويكون اختلافنا معاك نقطه توافق وانطلاق فى حب مصر والعمل على رفع اسمها ويكون تشجيعك للسياحه والسياحيين رساله موده وحب لكل العاملين فى كل المجالات.
احنا معاك ووراك وايدينا ممدوده عشان ترجع مصر للخريطه السياحية العالمية وتأمر بالمعروف للسياحيين وتنهى عن منكر وفتاوى وخرافات المتخلفيين.
قولوا معايا امين
